英超:蓝战士势颓遇强即屈 曼城格食格上盘劏车

今晚英超(英超,ENG PR)有场传统「Big 6大战」，车路士主场同曼城合演「双蓝会」。两支豪门今季表现差天共地，车仔季初经历换帅，但成绩仍然未如理想。反观衞冕嘅曼城获神锋艾宁夏兰特加盟後如虎添翼，趁住榜首阿仙奴(阿森纳,Arsenal)啱啱失分，今仗势必力争3分收窄差距。睇番两队近3次对赛，「蓝月亮」全胜兼冇失波，作客让到半一摆明够信心，上盘稳阵。 　　车仔季初怒炒杜曹，由白礼顿搵嚟朴达接手，初时表现确实有啲起色，但之後愈踢愈沉，近7仗联赛仅得1胜，上仗就被护级球队诺定咸森林逼和1比1，频频失分已经被前列抛离。车仔今季对住传统劲旅，亦往往遇强即屈，包括联赛不敌两支前列球队阿仙奴及纽卡素，以及喺英联盃输畀曼城，可见「蓝战士」整体水准已经脱离争标行列，加上列斯占士又因伤缺阵，缺少呢位攻守兼备嘅翼衞，实力大打折扣，遇上来势汹汹嘅曼城，情况绝对唔乐观。 　　曼城上仗领先下，意外被爱华顿逼和1比1，其实有啲欠运，包括史东斯飞顶中柱，错失锁定胜局嘅黄金机会。由於榜首阿仙奴寻日闷和纽卡素失分，令曼城有机会收窄双方差距，今仗就算作客都唔会守。「入球机器」艾宁夏兰特今季喺英超无坚不摧，呢位挪威前锋不断刷新纪录，成为英超史上最快入20球嘅球员，上仗对爱华顿又建功，唔够半季已经累积入咗21粒，单凭佢一个都足以令车仔防线「腾腾震」。 　　咪忘记除夏兰特外，曼城仲有祖利安艾华利斯、奇云迪布尼及菲尔科顿等数胡高手，令对手防不胜防。「蓝月」近4场英超作客赢3场，今场绝对可以反客为主，趁对手势颓踩多脚，上盘可取。